政壇：梁繼昌自掏腰包請員工台北旅行
跳槽風盛，連立法會議員辦公室都有員工流失率高嘅情況，有議員不惜每年加薪留住員工，會計界議員梁繼昌（Kenneth）就有另一種手法留人，佢好闊佬咁自掏腰包，一次過請晒成個辦事處員工去台北旅行。Kenneth話，因為覺得同事一年來好幫得佢手，於是決定請佢哋去台北旅行當獎勵。
梁繼昌大讚台北嘅咖啡同電影文化質素，慨嘆香港有排都未追得上。（受訪者提供）
不過，Kenneth話今次唔係齋玩咁簡單，佢亦要求同事順道考察當地嘅文化同保育政策，返香港後幫佢做多啲環保議題。唔知係咪第一日去到未有節目，Kenneth就趁機去當地有名嘅「等一個人咖啡」店朝聖兼歎咖啡。
Kenneth歎咖啡時亦不忘議會工作，佢話間咖啡店拍完電影後，竟然有電影「粉絲」頂咗間店繼續經營，大讚台北嘅咖啡同電影文化質素係亞洲鄰近地區之冠，慨嘆香港有排都未追得上喎。
