政壇：手機殼棄垃圾站 方國珊號召執寶
隨街執到寶當然唔好嘥，西貢區議員方國珊原來唔止一次喺垃圾站執到好嘢，仲留嚟自用添。尋日佢喺社交網站透露，有人喺將軍澳寶林北路附近嘅政府垃圾站丟棄好多電話保護殼，有市民通知佢，佢隨即發動街坊到場「執殼」，剩低嘅佢會拿走準備喺環保日派發其他街坊，希望可物盡其用，同時避免有關手機殼最後被運到將軍澳堆填區，加重堆填區負荷。佢仲話，過去亦曾喺堆填區附近發現大批全新嘅T恤，部分佢到今時今日仲着緊。
將軍澳寶林北路附近嘅一個政府垃圾站，有人遺棄成千上萬個全新嘅手提電話保護殼。（互聯網圖片）
睇佢貼喺社交網站嘅多幅照片，個垃圾站棄置咗成千上萬個全新手提電話保護殼，各種牌子同顏色都有，真係包羅萬有，只不過，呢啲殼所屬嘅手機型號似乎比較舊款，估計係由相關批發或零售商遺棄。
