政壇：小肥張賣口乖讚社企罐頭平
恒基地產副主席李家傑創立的家園基金，前日喺荃灣福來邨成立第六家社企便利店，包括勞工及福利局局長張建宗（小肥張）、行政及立法會議員林健鋒（Jeffrey）同立法會議員梁君彥（Andrew）等政界人士齊去見證開幕式。Andrew話，便利店夠晒方便，但係同佢兒時嘅士多辦館相比，少咗啲人情味喎，佢仲回憶小時候只有士多辦館，試過有一次士多老闆請佢飲一啖Tonic Water（氣泡飲料），一啖就愛上，到依家都仲成日飲添。
張建宗（左）讚豆豉鯪魚夠晒平，右為孫國林。
當日小肥張睇見便利店門口當眼位置擺咗好多罐豆豉鯪魚，就乘機賣口乖話，睇見佢哋鎭店之寶豆豉鯪魚只賣十六個半，平過市面賣嘅二十一元，咁熟行情？恒基執行董事兼家園基金董事孫國林就話，曾經有街坊幫襯買廁紙後，投訴佢哋賣得貴過大型超市，經過調查之後，原來係超市適逢周末大減價，於是佢哋就立刻減價。自此佢哋都要緊貼市場，時刻格價，確保貼近市民嘅購買力喎。
講到家園基金個名同另一間「新家園協會」好相似，孫國林爆料話，原本李家傑都猶豫，但後來佢游說話，恒基主席李兆基有兩個兒子，一個叫李家傑，一個叫李家誠，咁第三個仔咪叫李家園囉，於是咁就講掂咗嘞。
