政壇：新民黨殺入將軍澳 田二少兩頭唔到岸
新民黨同沙田政團公民力量（公記）結盟後，該黨首個新界東辦事處尋日開張，新辦事處位於將軍澳寶林，雖然新民黨勇闖將軍澳，但區內居民最關心嘅問題就係堆填區，偏偏新民黨表明撐政府擴建堆填區，點樣面對將軍澳選民呢？該黨副主席田北辰（田二少）似乎已有晒計劃，仲話會要求政府將廚餘運去屯門同打鼓嶺堆填區。嘩！為咗將軍澳地盤，田二少竟然肯「犧牲」自己所屬新界西選區嘅選民利益，唔驚到時兩頭唔到岸咩？
設計圖片及對白
料換血陳健浚上位
將軍澳辦事處將由該黨社區主任陳健浚（Ken）「駐守」，疑似會接替公民力量寶林區議員區能發。新民黨同公記年底會開集思會，討論嚟緊兩年嘅區會同立會選舉機制，兼評估新人表現及選生力軍。
主席葉劉淑儀話，公記部分區議員會競逐連任，但預計亦有部分地區會「換血」。區能發已歷任多屆寶林區議員，而且已年過六十歲，好可能會退休，睇嚟阿Ken好大機會上位。唔怪得阿Ken尋日賣口乖，話讀小四時開始住將軍澳，已見到區能發落區，依家終於可以掹衫尾學嘢喇。
犧牲自己所屬選區
不過，該黨如果要喺將軍澳殺出新血路，政府擴建將軍澳堆填區就係佢哋不能忽視嘅問題。田二少就話，「三堆一爐」齊齊做係該黨唯一支持政府嘅條件，佢哋嘅精神係全民協作，如果市民反對擴建堆填區，同佢哋理念唔同都冇計。
雖然田二少話理念係不能妥協，但選票始終要緊喎。田二少話，佢哋會要求政府答應興建廚餘中心，同將廚餘運去離民居較遠嘅屯門同打鼓嶺堆填區，減少將軍澳居民忍受臭氣熏天之苦。田二少仲話，如此一來佢所屬嘅選區都會受影響，將軍澳居民又點可以仲怪佢喎。
