包裝食品呃秤 皆因執法不力

係人都知，港人工作繁忙，生活緊張，愈來愈多人選擇購買預先包裝嘅新鮮食品，貪佢方便快捷，但估唔到呢類食品居然暗藏陷阱，一個唔覺意隨時中招。呢，消委會測試咗六十一個預先包裝嘅新鮮食品樣本，包括肉類、魚類、蔬菜及水果樣本，發現九成有呃秤之嫌，即係話淨重量比標示重量低。最離譜嘅係，其中一件牛扒樣本重量足足少咗兩成；而包裝魚類就算計埋薑葱豉油等配料嘅重量，仍然呃秤近一成。咁搞法，同買一斤蟹「送」半斤水草冇乜分別，根本就係欺騙消費者。小數怕長計，就算一件貨品呃幾両，加加埋埋條數都幾襟計o架。

正如消委會話齋，呢種呃秤現象愈來愈普遍，今次揭發嘅問題不過係冰山一角嘅咋。本港話就話係購物天堂，實際上消費陷阱無處不在，從健身、美容、音響、藥材到參茸海味，黑店梗有一間喺左近。以前就話呃訪港旅客比較多啫，依家連普羅市民日日幫襯嘅包裝食品亦不能幸免，問你怕未。

正所謂，萬變不離其宗，雖然不良銷售手法五花八門，無孔不入，但如果當局有心堵塞漏洞，加強巡查抽檢，甚至放蛇蒐證，又點會搞到消費者防不勝防吖。弊就弊在，港產官僚好似四方木咁，唔踢唔郁，甚至隻眼開隻眼閉，無良商家見有機可乘咯喎，仲唔乘機博懵咩。

古人話，世不患無法，而患無必行之法。根據《度量衡條例》，按重量供應嘅預先包裝貨物須按淨重量供應及標示淨重量，如果貨物實際淨重量較標示低，則屬違法；如果重量誤差達關鍵程度，仲可能違反《商品說明條例》添。法例白紙黑字寫得清清楚楚，可惜當局有法不依，執法不嚴，結果咪搞成咁囉。

海關話喎，舊年一月至今年六月，就預先包裝食品進行四十九次巡查，當中三間商店因違反《度量衡條例》而遭法庭定罪。你話嘞，相對於消委會踢爆九成預先包裝新鮮食品呃秤，海關巡查及檢控嘅數字似有若無，係咪純粹得啖笑吖？

講到底，要杜絕消費陷阱，保障消費者權益，必須主動出擊，加強巡查，嚴格執法。須知誠信易毀難建，香港「購物天堂」美譽來之不易，如果港產官僚繼續放軟手腳，得過且過，任由無良商人劏客，呢塊招牌遲早不保嘅咋，叮！