由百仁基金舉辦嘅「Be Hero慈善長跑賽」，按慣例會將善款分別捐畀慈善組織，但據聞佢哋今年將一改傳統，唔會捐畀善團喎，莫非慈善跑唔再係慈善活動？百仁基金主席Raymond李文俊話，明年嘅慈善長跑賽所得嘅善款將會用嚟成立獎學金，每年資助本港八間院校共十六個學位，往後隨着善款增加，資助學位數目亦會相應增加。

李文俊（左一）、百仁基金副主席羅詠詩（右一）、嶺南大學校董葉毓強（右二）等人聚餐商討來年慈善長跑賽。

Raymond話現階段計劃八大院校每間兩個學位名額，之後就每間院校資助三個名額，就算係醫科生獲得呢個獎學金，六年學費照樣資助，讓年輕尖子都可完成理想。點樣先攞到呢個獎學金呢？佢話係按申請者嘅成績及表現而定，再由獎學金嘅遴選委員會選出合資格嘅申請者喎！

至於遴選委員有乜嘢人？除身兼嶺大校董會主席嘅行會成員陳智思外，暫有前經濟發展及勞工局局長葉澍堃與港區全國人大馬豪輝。

第一手消息請下載on.cc東網iPhone/iPad/Android/Windows Phone Apps