城中鏡：蔡冠深分饗巨魚

劏巨魚好考功夫，操刀嘅係有三十年烹調日本料理經驗嘅香月利久師傅，見佢氣定神閒拿出幾把大小不一嘅刀，僅花十分鐘已將魚身分成多件，手法乾淨利落。林芳正睇見都忍唔住豎起拇指讚好，更指住「大拖羅」同「中拖羅」兩個部分，直言係佢至愛，請師傅留件畀佢喎！

築地直送保持鮮味

蔡冠深嘅大家姐蔡紹霞亦有份幫手競投巨魚，佢話為保持魚香同鮮味，直接將巨魚由築地漁市場空運抵港。不過，講到投魚價錢，Jonathan笑言唔記得，只知尺寸比佢大一倍的巨型吞拿魚，曾在日本創下一百萬港元身價的拍賣紀錄。

巨魚難求，當林芳正發現條吞拿魚原來產自其家鄉山口縣，笑到見牙唔見牙，臨走前送上一個用山口縣雞泡魚製成嘅魚標本作回禮，話多謝蔡冠深咁有心思。

品嘗完新鮮吞拿魚，蔡冠深細訴月前剛成功「拆彈」。早前越南發生排華暴亂，其廠房亦險遭殃，幸得當地美籍廠長臨危不亂，知道暴亂後飛車回廠，第一時間將廠外的中文字招牌拆下，並向路過的暴徒揮手打招呼，暴徒見佢係外國人，兜咗三個圈就離開，最後廠方絲毫無損，認真好彩。