周之無時，聽聞四方雜音，話香港年輕人文化質素下降，唔識字，鬼咩！中央國策「愚民化」的香港教育制度之下，唔好話新一代的語文能力陽痿，就是那些日日喺報章爬格仔的大作家，遣詞用字，亦唔見得好咗去邊！

呢幾日，各報大小專欄寫「反佔中」行動時，一面倒的用「氣勢如虹」四字來形容，唉！真有辱呢個咁鬼「正氣」的詞彙。張融領導下的「反佔中」活動，不斷出現「灌水」、「騎劫」、「作假」、「虛報」、「抄襲」，甚至「內鬥」、「爭功」的暴力感，咁都叫「氣勢如虹」？

尋日，呢個「反佔中大聯盟」又被傳媒踢爆挪用已註銷的團體名義來聯署，醜態一日比一日過分，但「大聯盟」班粉皮卻一日比一日得戚，好「氣勢如虹」囉！

嗰日，約老友到中環聚餐，沿途十步一檔的「反佔中」簽名街站，佔領緊中環，多到阻街塞路。見啲檔口布置甚有中國味，遂舉起相機影兩張reference啦！坐喺檔口拍緊烏蠅的兩工友，一（目及）到我影相，女的，立即擰歪面，男的，閃埋個紙箱後面；本人最愛紀錄真相，當然將「事實」拍下，那個男工友見我繼續影相，佢竟起身離開添！喂！乜你哋咁o架！開緊工，有水收個喎！吓！乜話！義工？哦……你哋唔知有過億維穩費做狗糧o架咩？

即使做義工，也要專業至得o架！唔通你哋覺得做呢單嘢好羞恥咩？畀人影到，就好樣衰咩？做義工，係應該自願的嘛！有份做到氣勢如虹，應該好光宗耀祖o架！

嗱！過兩日的大遊行，一定好多記者沿途拍攝的，你哋「正能量樣子」（簡稱「正能樣」）可有機會上鏡的，準備吓啦！我一定嚟影你哋個樣！

就算好彩無見報，但一個人在世間做過乜嘢好事，閻羅王和上帝都會有詳盡紀錄的，無得走數o架！

號稱百萬大遊行當中，我倒擔心啲公公婆婆烈日當空中受苦，真不忍心！作孽者，實有報應！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android/Windows Phone Apps