喺兩個月前，反對新界東北發展示威者利用竹枝同鐵馬企圖衝入立法會大樓，暴露大樓有嚴重保安漏洞，搞到行政管理委員會事後要委託顧問公司檢討大樓保安。立法會前秘書長Pauline吳文華尋日喺網台節目透露，行管會早喺發生高鐵事件前，已經同工程承建商簽訂興建新大樓合約，雖然大家之後都諗過係咪加強新大樓保安，但最後因為改合約價錢太貴而作罷。

設計圖片及對白

行管會急諗計補救

Pauline透露，早喺反高鐵示威者動員包圍中環舊立法會大樓前，行管會已經同承建商傾好興建立法會新大樓嘅細節，仲已經簽埋合約。雖然事後有行管會委員提議更改部分設計加強大樓保安，但秘書處就話，合約訂明如果行管會在十八個月內更改設計，就當係更改合約條款，要額外畀多一筆錢。

由於當時興建新大樓已經所費不菲，如果突然又要使多一筆公帑，有可能會被公眾責難，所以最後都係維持原有設計。不過，經歷新界東北發展示威一役，行管會先發現大樓保安好似豆腐渣咁一啲都唔可靠，於是急急腳諗計補救，真係因小失大。

第一手消息請下載on.cc東網iPhone/iPad/Android/Windows Phone Apps