政壇：嫻姐帶隊上廣州睇保育
依家立法會放緊暑假，唔少議員都趁機外遊充充電，但工聯會陳婉嫻就寄情考察工作，早兩日靜靜雞帶埋工會老友一行十幾人，北上廣州考察當地嘅文物保育發展，一直支持保育古蹟嘅嫻姐，眼見廣州市政府對保育發展比香港走得更快、更前，感慨香港依然停滯不前。
陳婉嫻（右二）帶隊上廣州，考察當地嘅古蹟保育發展。（受訪者提供）
獲邀嘅人士喺廣州當局帶領下參觀全國重點文物保護嘅南越王宮博物館。呢個博物館係中國秦朝、西漢時期南越國王宮嘅遺址，當地市政府深明需要平衡發展、保育，不惜叫停發展，南越時期嘅木製水閘遺址先得以保留，而遺址上蓋依家就興建購物商場。
嫻姐慨嘆廣州市至少都專設文化局處理當地古蹟文物事宜，雖然香港都有古物古蹟辦事處，但在保育議題上始終唔夠牙力，連香港市區最後一條圍村「衙前圍村」都敵不過發展嘅硬道理已被迫遷拆，難怪佢感慨咁深嘅。
