政壇：田二少橫額被抄橋反諷
立法會議員「田二少」田北辰早前喺社交網站上載咗自己一幅質疑低頭族扮睇唔到，要求立法規定要讓位嘅橫額，但自從呢幅橫額一出街，就引來網民議論紛紛，而田二少之後又喺網上留言，話街板未必能準確表達佢嘅意見喎。不過，近日有人發現田二少呢幅橫額旁邊，就出現咗另一幅設計同排位好相似嘅橫額，但表達嘅內容就截然不同。
「阿來」嘅橫額（左）抄足田二少橫額嘅設計。
究竟邊個抄田二少嘅設計呢？咪就係田二少嘅前助理「阿來」趙恩來囉！阿來自轉投工黨後，就多次傳出佢可能於明年區議會選舉挑戰田二少，點知近日喺荃灣街頭，真係陸續出現阿來嘅橫額，而阿來最新面世嘅橫額就抄到同田二少嗰幅熱論橫額嘅設計一模一樣。
不過，橫額上嘅標語變咗為「保皇黨扮聽唔到，立即落實真普選」，唔知係咪想寸埋田二少呢？
