SUN焦點：有工冇人做 港島食肆叫苦
新界區急速發展，竟令港島區飲食業界「大叫救命」。新界區基層員工拒絕再跨區工作，視港島區工作為「豬頭骨」，業界估計現時缺約一萬五千名員工。「有工冇人做」，不少食肆紛紛出招救亡，包括提高人工及津貼約一成、增加晉升機會，以及改善工作環境如加裝冷氣添置洗碗機等，藉以吸引住在九龍或新界人士前來工作！人手不足，業界擔心，在繁忙時間的服務質素會受影響，顧客因而卻步，在惡性循環下，生意減少。
有餐廳購入洗碗機，提供較舒適工作環境留住員工。
馬小姐表示，由於公司提高薪金，所以願意由屯門到銅鑼灣工作。
港島一間餐廳，聘請侍應生的薪金為一萬二千五百元。
港島區飲食業正面臨「有工冇人做」情況。
鄧秉雄指，公司根據員工居住地點及經驗等因素，釐定薪酬。
港島返工制唔制
陳小姐 （居於九龍）：去港島交通時間長、車費貴，如果要到港島區返工，要多一千至二千嘅薪金，先會吸引到我。
林小姐 （居於新界）：唔介意去港島區返工，最重要係自己有興趣及有晉升機會。
全港飲食業空缺數目
多間港島區的食肆，為求留住人才及吸引員工跨區上班，萬多元的工種，亦不惜提高薪酬及交通津貼共一千五百元，吸引員工。「我住喺屯門，一直都喺九龍區返工，不過公司希望我去銅鑼灣新開分店幫手，公司知我長途跋涉又要轉車，所以畀多一千五百元薪金及交通津貼。」在茶餐廳任職主任的馬小姐坦言，由屯門到九龍上班，來回車程約個半小時，交通費二十元，但到銅鑼灣，來回車程增至三個小時，車費近五十元，「有得揀，當然選擇較近屋企嘅地方返工啦。」
「港島區嘅飲食業，正面對『有工冇人做』嘅情況。我間公司嘅連鎖餐廳，將港島、九龍荃灣葵青、新界北嘅薪酬，分作三個級別，同一工種，願意到港島工作嘅員工，會有一千多元嘅額外薪酬，例如做樓面，人工就由一萬一千元提高到一萬二千多元。」銀龍飲食集團執行董事鄧秉雄指出，該公司以調高薪酬，盡量按照員工居住地區分配上班工作地點，所以聘請情況，未如其他食肆般困難。
長期缺人 服務質素變差
除提高薪酬外，多間食肆亦以改善工作環境吸引員工，「所有員工都會喺有冷氣嘅環境工作，洗碗工仲會有洗碗機用，盡量畀員工做得舒服啲。」一間連鎖餐廳的負責人指出，為吸引年輕人入行，餐廳會增加晉升機會，「餐廳嘅管理員工，都係由送外賣開始，希望佢哋可以見到晉升階梯」。
港島區食肆請人難，與新界急速發展有密切關係，「經濟轉好，每個行業都會請人，很多基層勞工都住喺九龍或新界區，佢哋寧願揀近屋企，都唔想跨區到港島。」香港餐飲聯業協會會長黃家和相信，業界將工資提高及增加津貼，已成為普遍吸納更多人加入飲食業的方法。
「如果持續缺乏人手，一定令服務質素下降。特別喺星期六、日及公眾假期嘅繁忙時間，全間餐廳坐滿客人，員工做到踢晒腳，執枱及斟水都冇人得閒做。曾經有顧客因為等咗好耐都未有得食，結果嬲爆爆走咗。」香港餐務管理協會主席楊位醒估計，全港約有一萬四千間食肆，港島約三千間，港島區缺人兩至三成，至少欠一萬五千名員工。
勞工處發言人表示，飲食業的空缺，由一一年約十四萬人，急升至一三年的逾十七萬人，僱主可透過勞工處的免費招聘服務等不同途徑，招聘人手。
