城中鏡：陳思靜囡囡係星級童模
從政嘅人通常好怕公開自己仔女係邊個，因為想畀仔女多啲私隱，但如果仔女係明星，又唔同講法，始終做星爸的確幾威風。好似元朗區區議員陳思靜，除咗自創一招「貨櫃議辦」廣為人知外，原來佢位四歲大嘅千金Yanson陳映淳係廣告界寵兒，最近Yanson嘅奶粉廣告啱啱出街，無論係電視機定巴士都見到阿女個樣。唔知陳思靜見到會唔會特別掛住個女呢？
兩父女感情好好，最鍾意放假周圍去玩。（受訪者提供）
陳思靜愛女Yanson最新一輯廣告造型照。
今年四歲大嘅Yanson，係唔少廣告商御用模特兒，雖然人仔細細，但已經「入行」兩年，至今拍過十幾個廣告，由消毒藥水到奶粉廣告都拍過，經驗非常豐富。做咗星爸嘅陳思靜話，兩年前太太經常將一家三口合照放上社交網站，結果Yanson嘅大眼睛同甜美笑容吸引到廣告商留意，之後先開始「兒童model」生涯。雖然演出經驗豐富，但Yanson就快到入學年齡，睇嚟做星爸嘅陳思靜，係時候幫愛女諗下點分配時間至得嘞！
