設計圖片及對白
根據建制派嘅內部協議，立法會財務委員會十月復會後，會改由飲食界張宇人做主席，到最後一年再輪番到「星爺」吳亮星，民主黨主席劉慧卿最多只能做副主席。但星爺過去一年嘅表現實在令人慘不忍睹，連政府都好有微言，唔少建制派私下都表明唔會再畀星爺做。
其中有人提議由近年表現硬淨嘅保險界陳健波接手，但又有人話佢始終都未做過主要委員會嘅主席，加上一眾激進泛民，肯定會喺最後一年「玩鋪勁」瘋狂拉布，建議不如改由卿姐接呢個燙手山芋。若然最後出咗事令某啲重要民生撥款過唔到，市民要怪就怪責泛民同卿姐，建制派唔使孭鑊！
「需迎難而上精神」
其實，卿姐曾做過多年財委會主席，即使近年多次角逐失敗，佢都屢敗屢戰，從冇退縮，但尋日被問及會唔會再戰財委會主席時，就好罕有咁話要再考慮吓先。佢一方面數番自己當年做財委會主席時，連開幾十個鐘頭會，結果高鐵撥款如期通過嘅「戰績」。但佢又透露有泛民議員同黨友私下勸佢唔好參選，一來係勝算低，二來就算成功當選，都會做得好辛苦，似乎係識穿咗建制派嘅奸計。
問佢係咪怕咗激進泛民發動嘅拉布戰，卿姐並冇直接回應，但係就承認財委會工作近年變得愈嚟愈複雜，做主席一定要有迎難而上嘅精神喎。唔知佢係想講畀張宇人等建制派同事聽，定係自己仲係心大心細，仍然想迎接呢個挑戰呢？
第一手消息請下載on.cc東網
