政壇：維權律師滕彪轉戰哈佛
唔少出席今年六四燭光集會嘅市民，都會認同當晚最令人慷慨激昂嘅發言，並非來自本港嘅泛民人士或流亡海外嘅學運領袖，而係來自內地嘅維權律師滕彪。滕彪年前嚟咗香港，喺中文大學法律學院做訪問學者，兩年合約同相關工作簽證就快屆滿，本月底佢就要離開香港。佢尋日透露，美國哈佛大學已邀請佢做訪問學者，又自言喺留港期間不斷寫文章同發言批評內地政府，今後可能要長期流亡海外。
滕彪喺中大嘅兩年合約即將屆滿，本月底會轉戰美國哈佛大學擔任訪問學者。（資料圖片）
滕彪接受傳媒訪問時話，過去一年內地當局對維權律師嘅打壓愈嚟愈嚴厲，但呢種高壓手段，並冇令願意擔任維權律師嘅內地人減少，由○三年全國估計只有幾十名維權律師，到依家已經增至上千人，相信未來會有更多人加入維權行列。
滕彪今次轉戰美國哈佛，合約只有一年，但係佢就坦言暫時都未有歸期，甚至可能要過流亡生活。佢又話就算身在美國，都會繼續留意內地嘅人權狀況，同埋香港政改嘅最新發展。
