政壇：施榮懷合家歡探愛駒
馬季抖暑，但唔代表班馬主好得閒無嘢做，唔少馬主都忙於幫愛駒備戰。好似廠商會會長施榮懷，最近就拉埋老婆同一對仔女去咗沙田馬場探班，原來阿施舊年買咗隻新馬後，隔咗半年都未見過或摸過，尋日終於有時間去探吓「囝囝」。
施榮懷（右二）帶埋太太同一對仔女去咗沙田馬場，探吓新購入嘅「非同小可」。（互聯網圖片）
平時通常自己一支公入馬場嘅施榮懷話，今次拉大隊一家大細去探班係有原因，因為呢隻新馬「非同小可」，係由細仔施仲樂負責改名，咁當然要叫埋佢睇下匹愛駒係乜嘢樣啦。叫得個仔，就不如叫埋囡囡同老婆，最後仲一齊同隻馬合照。雖然呢隻新馬仔只得三歲，但施榮懷話佢非常擦得，每日食好多紅蘿蔔，希望九月處女落場出賽會有好成績。
