政壇：環局死因箍唔掂建制
由「星星」黃錦星做局長嘅環境局，加上副局長Christine陸恭蕙同政治助理Michelle區詠芷三人各有所長，前年年底埋班時被視為環保「新夢幻組合」，不過接近兩年過去後，「新夢幻組合」呢個稱號只係一廂情願，相反發現三人有一大盲點，就係原來冇人識向建制派拉票。箍唔到票，到頭嚟咪畀人箍到實，想郁都冇得郁。
設計圖片及對白
建制斥唔識做官
最近有兩件事「甩轆」進一步凸顯環境局鐵三角呢個盲點，分別係意外地畀議員中止待續甚至否決嘅小蠔灣廚餘回收中心同活化已復修堆填區計劃，據聞呢兩件事「死因」都係建制派無出力護航，主力推銷者都係同泛民關係較好嘅Christine，當中嘅政治訊息不言而喻。
至於星星，講專業範疇知識可能首屈一指，但講到同建制派「打交道」就不敢恭維，聽聞有建制派資深大佬仲直斥佢唔識做官，之後語重心長教星星應該點樣用書信同議會來往，以便議會友好助佢一臂之力，加上Michelle主力分配做環保團體游說工作，較少同議員接觸，因此先會有三名問責官員無人擅長游走於建制黨派議員嘅局面。
補鑊救三堆一爐
據聞建制派普遍對當局「有事鍾無艷，無事夏迎春」嘅作風心中有氣，次次都係出事或者聞到味時先至補鑊，有建制派議員仲話三名問責官員有環保理念係一回事，但都要有政治手腕配合，而擺在眼前未來一場大仗，就係「三堆一爐」喺十月立法會復會後正式向財委會闖關，要亡羊補牢，依家就係最佳時機，環境局鐵三角會唔會痛定思痛，重新修補同建制派嘅關係，開啟有商有量嘅新局面，一切只喺佢哋一念之間嘞！
