早前工黨主席李卓人自爆將壹傳媒老闆肥佬黎捐畀工黨嘅一百五十萬元捐款「袋住先」,搞到一身蟻兼水洗都唔清,可惜一波未平一波又起。

設計圖片及對白

有網台爆料,指阿人尋日「吹大雞」約齊學聯、民陣、真普選聯盟召集人鄭宇碩等泛民主派政團商討佔領中環行動,但唯獨人民力量同社民連兩大激進泛民無份。人力嘅「大舊」陳偉業得悉會議後要求加入,竟反被阿人以「唔方便」為由拒絕旁聽或列席。阿人搞小圈子商討佔中,唔通佢想學肥佬黎密謀攪局,飛起人力同社記做佔中共主?

大舊引述阿人指會議唔會有任何決定,但佢認為佔中咁大件事,應邀請所有表明會佔中嘅政團參與討論,人力反而要從第三渠道先獲悉有會開,擔心人力連討論嘅機會都冇,最終會被「賣豬仔」,又質疑阿人點解可以預先知道開會冇決定,「咁開嚟做咩?」據講今次會議連邊個牽頭都各說各話,有人話係真普聯牽頭,唔關阿人事,但如果唔係阿人牽頭,咁阿人又有乜資格拒絕人力同社民連參與呢?

大舊有隱憂不無道理,據知尋日會議齊集身兼真普聯成員嘅公文袋余若薇同梁家傑,已退出真普聯嘅白鴿黨何俊仁都有份,阿人以唔方便為由拒絕同屬真普聯嘅人力同社民連,認真講唔過去。難怪網民紛紛留言撐人力,鬧爆阿人想做佔中「獨家代理」、「又想好似將肥佬黎啲捐款袋住先,然後私有化」,甚至質疑阿人想搞分化統戰喎!

第一手消息請下載on.cc東網iPhone/iPad/Android/Windows Phone Apps