政壇：林一鳴挑戰極限玩「三鐵」
由中信証券國際跳咗去上市公司漢能太陽能做財務董事嘅Eddie林一鳴，工作性質同環境轉變幾大，但作為投資專家，應該冇乜財務工作難到佢，唯獨有件事就令佢有啲頭痕。
林一鳴轉咗工，暫時冇得跑步返公司。（資料圖片）
講緊嘅就係點樣跑步返公司。查實Eddie好鍾意跑步，玩咗馬拉松好多年全行都知，佢甚至可以喺屋企渣甸山跑返去港島區Office，但問題係新公司總部喺九龍ICC，Eddie話真係冇辦法，惟有星期六日跑多啲步，加操補數。
事實上，佢近年不斷挑戰極限，升呢玩埋三項鐵人，游水、踩單車都包攬埋，佢仲話幾個月前先玩完一個三項鐵人賽，成績都OK。咁想唔想拎第一名，佢話：「唏，幾十歲人唔會爭第一第二o架喇。」
點樣幫Eddie解決跑唔到步返工嘅問題？其實佢可以考慮吓由渣甸山踩單車去中環，然後游水去尖沙咀，再跑步返ICC，呢個「三項鐵人式」上班方法，唔知佢制唔制呢？
