政壇：金刀梁為慈善登台爆肚
香港長者協會及馬鞍山靈糧小學早前合作舉辦慈善英文音樂劇，請埋長者學苑發展基金主席「金刀梁」梁智鴻客串粉墨登場，同資深演員林小湛拍住飾演祖父母角色。
梁智鴻（右）首次登台做戲扮阿爺，話演番自己冇難度。左為林小湛。
今次係金刀梁首次登台，林小湛大讚佢表現好自然，一啲都唔怯場。金刀梁就話只係做番自己，所以連劇本都唔使點背，即場爆肚咪夠晒自然囉！
呢套話劇係由馬鞍山靈糧小學靚女校長陳美娟一手一腳包辦，佢由劇本、背景音樂至舞台布置都有參與。陳美娟話音樂劇主要以英文為主，其中金刀梁有份演出嘅部分就以中文演繹，方便長者。
當日臨開場前，金刀梁提早一個鐘頭到達，佢笑笑口話，因為事前冇特別練過戲，所以專登早啲去綵排。佢話已經有兩個孫仔，今次叫佢扮阿爺，簡直係一啲難度都冇。
