喺立法會大樓被反對新界東北撥款申請嘅示威者衝擊後,行政署上月中突然關閉政府總部東翼廣場,宣布因為保安理由而要喺廣場周邊加設三米高圍欄,被質疑有意打壓示威自由,「門常開」變「門常關」。雖然泛民主派即日已鬧爆政府企圖用高牆隔絕民意,但佢哋後知後覺延至尋日先約見行政署署長蔡潔如表達不滿,又叫行政署拆走起好一半嘅圍欄,結果無功而還不特止,仲被人噴到一面屁。

設計圖片

政總外嘅廣場圍欄工程已經完成咗一半。

包括馮檢基、張超雄、梁家傑同涂謹申等在內泛民八位議員,尋日去政府總部同蔡潔如會面。涂謹申會後引述蔡潔如話,喺政總外加建圍欄係政府內部嘅集體決定,又話政總廣場一向唔容許市民示威,只係以前政府中人「隻眼開隻眼閉」,唔會亂咁趕走啲示威者,依家咁做係要「撥亂反正」。蔡潔如之後又以商業處所為例,話商業處所嘅管理層都有權管理自己嘅地方,覺得政總保安屬於政府內部事務,事前唔需要諮詢公眾喎!

即時否決 工程繼續

聽到蔡潔如將政總比喻為商業處所,泛民議員即時大動肝火,七嘴八舌咁鬧爆行政署鬼鬼祟祟起圍欄,企圖收緊市民和平請願嘅自由,又批評咁做同先斬後奏毫無分別。喺呢個時候,蔡潔如木無表情咁拋下一句:「咁你哋有啲咩更好嘅建議呢?」泛民議員即時提出要求行政署拆走就嚟起完嘅圍欄,重新開放政總廣場,蔡潔如都無佢哋咁好氣,即場拒絕咗要求,維持原判繼續工程。

喺工程完成後,政總廣場嘅開放時間將會改為朝六晚十一,示威人士要先向行政署申請先至可以入內示威。被問到泛民咁遲先投訴係咪為時已晚,涂謹申反指政府當初蓄意製造既定事實,將政總圍到好似一座監獄咁,強調泛民議員會開會商量對策,並考慮喺立法會繼續跟進事件,但到立法會復會後,圍欄已經起完喇,仲等你哋咩!

第一手消息請下載on.cc東網iPhone/iPad/Android/Windows Phone Apps