SUN搞作：打橫嚟講：依法治國？講呢啲！
香港西環有小芝麻官代佢阿爺出聲，話嚟緊呢個乜春第幾大嘅乜春會議，會高舉「依法治國」的旗幟喎！
哈哈！世上，有哪個地方不是以法治理的呢？基本平常事而已！須日日講三次嗎？屁話！
依法治國？對香港人來說，太遙遠了！睇番香港本地罷啦！
「香港大陸化」得叫中央領導人瞓着都笑醒，仲點使五十年不變吖！在黨員主政下，十八月便能「真正回歸」矣！
弄虛作假，不顧廉恥的大陸高官作風，早已植入香港官場，話知你當眾踢爆，亦繼續「優化」，一日比一日醜惡兼多產，吹咩！
早前，由政務司司長林鄭揸fit的呃鬼「築福香港」，豪花香港市民血汗公帑，搞大龍鳳，拍「寫實片」宣傳，搵咗件「賣粥」的阿叔，義派愛心粥畀啲婆仔，講到佢「小人物，做大事」，偉大過毛主席；點知，原來係收咗錢出鏡嘅「演員」，咁樣「呃like」，仲唔算「行騙」？若擺明係「戲一場」，唔該早響，兼在電視屏幕頂處出示要有家長陪同觀看嘛！
香港廢柴政府最高層以講大話手段行騙市民，正所謂「上樑不正下樑歪」囉！繼梁粉囤地波有人包庇，囤地過骨後，咪又爆一樁地政總署助理署長林嘉芬涉嫌利用職權取得敏感發展資料，囤地牟利囉！林嘉芬聲稱因丈夫喜歡耕種，才買下此地，又話「事後」已申報云云，此等「狡辯」，不禁令人搖頭。
身為地政署高層（或一地高官），最簡單、基本的守則也不顧？那是叫做「避嫌」呀！
任何處境，總有些「法則」要堅守的，例如警察當更時要着制服，甚至不准染金毛綠毛，即使你有癖好，也得犧牲！
香港的「守法」精神，從高官至小市民，已不再重視時，呢度，只係中華人民共和國嘅其中一個小島而已！
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊(目及)實政府
