政壇：搞搞政：學民仔話無收過肥佬黎捐款

雖然成立短短兩年嘅學民思潮未涉及政治獻金醜聞，但唔知係咪聞到陣臭除，有成員最近自行公開財政紀錄。勢估唔到呢班學生哥兩年內已「吸金」約三百萬元，籌款成績好過唔少泛民政黨，但亦因呢個原因，令部分人懷疑呢三百幾萬元捐款中，到底有無包括肥佬黎捐款。

召集人黃之鋒接受傳媒訪問時透露，學民仔過去一直只接受市民小額捐款，從來唔接受巨額捐款，所以斬釘截鐵話無收過肥佬黎錢，亦無收過其助手Mark Simon嘅錢。佢仲話如果肥佬黎過數落學民思潮銀行戶口，佢哋知道後會即刻過番數畀肥佬黎喎。不過，被問到如果肥佬黎將幾千萬元「唱散」，然後入落學民思潮籌款箱，咁佢哋又收唔收呢？

唔答收唔收巨額「散紙」

黃之鋒面對呢條問題都不置可否，只係重申唔會接受巨額捐款，因為唔想被人感覺學民思潮被某某人士操縱。咁即係點？唔通有人唱散啲捐款就會收？如果肥佬黎喺過去嘅遊行捐咗好多「散紙」畀佢哋，佢哋都當係市民小額捐款呢？睇嚟佢下次要答得再清楚啲，先能夠釋除市民疑慮嘞。我哋尋日嘗試致電向黃之鋒查詢，但佢未有回覆。

不過，已捲入政治獻金醜聞嘅社民連立法會議員梁國雄，就再被揭發去年靜靜雞將「社會民主連線有限公司」清盤，然後將社民連轉為社團形式營運。由於有限公司需要被認可核數師睇數，又要向稅局報稅，無論手續定文件都比社團複雜得多，令人懷疑社民連係咪帳目不清有古怪先要咁做。我哋亦致電向梁國雄查詢，但同樣未有回覆。