久未露面嘅立法會前勞工界議員「鄺大狀」鄺志堅尋日現身一個聯署活動，同工聯會黨友陳婉嫻等人爭取尋求共識，實現特首普選。不過，鄺大狀喺活動完結後走都走唔切，對普選期望唔肯多講兩句之餘，仲自嘲只係「路人甲」，叫記者有乜嘢就問身旁嘅嫻姐喎，六十歲都未夠嘅佢更自爆準備退出政壇添！

鄺志堅打算退隱，連早年開設嘅顧問公司都準備摺埋。

自卸任議員後，鄺大狀除自立門戶做政治顧問，專責為建制派新人抬轎外，早兩年更應徵過勞工及福利局副局長，早前仲講緊計劃為立會選舉培訓工聯會新星，百足咁多爪。不過，最新消息係佢原來打算退休，仲自言已脫離政壇，更準備摺埋間顧問公司，現時只係路人甲一個。

點解連間顧問公司都唔要？大狀只係笑言「生意唔好囉」，係咪政界冇人搵佢幫手呢？佢貫徹「路人甲」嘅身份，一個箭步就極速行開咗，講多兩句都冇。

第一手消息請下載on.cc東網iPhone/iPad/Android/Windows Phone Apps