政壇：建制被fb「滅聲」 莫乃光 馬逢國爭出頭

笑指要去中聯辦請願

兩大陣營對壘，現實中間中會出現暴力鏡頭，網上亦有網絡欺凌情況。由八個團體組成嘅「facebook版主反滅聲大聯盟」（大聯盟），尋日就約見立法會資訊科技界議員莫乃光同體育、演藝、文化及出版界馬逢國，要求對方跟進多個親政府團體嘅fb專頁被無理刪除一事，但成件事都係得啖笑。

大聯盟繼去美國領事館投訴後，尋日就走去立法會遞信，又當面向莫乃光同馬逢國投訴。大聯盟發言人劉轉好話，近月有泛民評論員喺網上呼籲泛民支持者用集體投訴嘅方式癱瘓佢哋嘅fb專頁，令fb管理員強制刪除佢哋多個發貼，認為對方咁樣嚴重威脅言論同網絡自由，要求兩位議員積極介入事件，保障網民自由表達意見嘅權利。

不過，馬逢國話初時都唔明大聯盟點解會搵佢幫手，諗咗好耐先醒起自己係資訊科技及廣播事務委員會委員，於是就聽吓佢哋有乜訴求。莫乃光就話fb管理員只要一收到大量投訴，就會不問理由刪去被投訴嘅貼，但由於fb係美國公司，佢可以做到嘅嘢唔多，只可以幫佢哋寫信去fb反映情況。

莫乃光又話之前試過喺微博發表「佔中」言論，同樣被管理員強制刪貼，仲講笑話，既然網民去美國領事館抗議，佢可能都要去中聯辦請願喎！