城中鏡：王賢誌為慈善DVD激瘦
新任東華三院副主席Vinci王賢誌一向熱心公益，依家不惜暫時拋下固有娛樂圈嘅工作，全情投入慈善工作。Vinci話二○一四年係自己榮升東華副主席同入行二十周年的大日子，希望融合多元化嘅身份嚟創作一樣意義重大嘅紀念品，佢話：「將自己之前主持咗兩年嘅電視訪談式節目輯錄成DVD《誌友共聚 Vinci's Code》，自己留念之餘仲會義賣，得到嘅收益唔會扣除成本，全數撥捐畀廣華醫院嚟重建！」
王賢誌話希望慈善DVD可籌得嘅善款衝破五十萬元。
自資六位數字發行慈善DVD嘅Vinci笑言自己為籌備呢張專輯輕咗十幾磅，係人生磅數嘅低點，佢話：「不過我諗如果籌到嘅數字同我跌嘅磅數成反比就好啦。」佢更透露首輪優先認購已籌得約港幣二十五萬元，希望最後可衝破五十萬元關口，佢又話：「張DVD喺今個月頭就會見街，定價大約係二百蚊或以下。」
