政壇：搞搞政：何俊賢 胡志偉睇中鄉郊磚頭

高佬賢早前喺元朗橫洲買咗個村屋單位，啱啱上月底先攞鎖匙，成功上車。佢透露，前年立會選舉時喺元朗市中心租咗個單位，唔知業主係咪見佢當選咗做議員，舊年要求加租，佢最後決定搬返屋企同媽咪一齊住。之不過，佢一直都想有自己嘅私人空間，加上做咗議員呢兩年都叫收入穩定，所以就心思思想買樓自住。 喺街坊介紹之下，佢最終睇中呢個約七百呎、賣二百多萬元嘅村屋地下單位，連畀地產經紀嘅錢都慳埋，而佢買村屋純粹喺用嚟自住、貪個位置近媽咪，可以成日返去飲湯喎！

我哋又發現，原來胡志偉太太前年都花咗一百五十萬元，喺西貢井欄樹附近買咗個頂層連天台嘅村屋單位。但胡志偉直言自己係投資盲，嗰時同太太行行吓街，太太見到間地產舖嘅街招介紹呢個村屋單位，覺得「幾OK」，於是就好似買衫買菜咁買咗返嚟收租。佢自言個單位用太太個名，由對方全盤打理，佢連間屋一個月幾錢租都唔知，亦唔清楚太太仲收埋幾多私己錢。

最近多名泛民議員被揭涉嫌漏報收受壹傳媒黎智英巨額捐款，我哋睇番高佬賢同胡志偉喺立會嘅利益申報紀錄，都搵唔到呢兩間屋。高佬賢解釋，佢問過助理同秘書處，自住物業係唔使申報嘅。胡志偉方面亦指出，由於間屋佢本身無權處置，亦冇從中獲得金錢利益，所以同樣唔使申報。