政壇：Google主席拍賣飲咖啡時間
又有美國慈善網拍賣名人私人時間嘅活動，呢趟係一個名為Charitybuzz所搞嘅慈善拍賣，而呢次拍賣嘅就係谷歌（Google）嘅執行主席施密特（Eric Schmidt）嘅飲咖啡時間嘞！
施密特拍賣飲咖啡時間做善事。（資料圖片）
呢次嘅見面地點定咗喺谷歌嘅紐約寫字樓，而時間只係得三十分鐘，競投成功嘅人恐怕要做下功課，諗定問乜。現時有六個競投者，最高嘅出價係十萬零五百美元。網站預測呢項拍賣嘅價位可以推高到五十萬美元。呢次拍賣所得嘅善款將會捐畀一個藝術機構（Rush Philanthropic Arts Foundation）。
不過，講到拍賣飲咖啡時間，施密特並非第一人。好似蘋果公司CEO庫克（Tim Cook）剛剛就喺今年五月以十九萬三千六百英鎊捐出自己嘅時間，施密特今次嘅拍賣將會喺八月十四日結束，一齊睇下佢最終會捐到幾多錢喇！
當然，講到呢種名人拍賣私人會面時間嘅表表者，自然係股神巴菲特啦，佢自二○○○年開始，每年舉行一次慈善拍賣自己嘅午餐時間。今年嘅競投者最終成功以二百一十七萬美元買到同佢會面嘅機會。
