政壇：小米做內地一哥即惹火
調研公司Canalys嘅最新報告話，以出貨量計，今年第二季由雷軍揸fit嘅小米手機喺內地嘅市場佔有率升到百分之十四，第一次爬咗三星頭，成為內地智能手機廠商嘅新一哥。唔知係咪因為江湖地位嘅提升，搞到班小米員工開心過咗龍，有位小米員工尋日竟然喺微博發文，明寸有心想過檔小米嘅前諾基亞員工喺舊公司歎慣，好難喺小米搵到咁舒服嘅工。呢個微博一出街，即時引來網民圍攻，鬧爆小米唔尊重行業前輩，件事愈搞愈大，爭啲演變成為公關災難。
雷軍嘅小米手機首次爬過三星頭，成為內地智能手機廠商嘅新一哥。（資料圖片）
呢位小米員工喺微博話，同想過檔小米嘅諾基亞朋友傾偈，發現諾基亞薪水高假期多工作少，基本上唔使做嘢咁滯，跟住又感嘆小米「沒有這種好職位」，以突出小米員工嘅勤奮。
微博一出即時有幾千條回應，一面倒咁鬧小米太囂張，有網友話每個行業都會有先行者同後來嘅崛起者，對開闢行業嘅巨人保持敬意，係新貴最起碼嘅素質，而大連萬達集團太子爺王思聰更炮轟小米係「小人得志」。
今次就連阿里巴巴都加入抽水行列，喺官方微博發文勁讚諾基亞係一間偉大嘅公司，話阿里認同佢哋喺行業中作出嘅傑出貢獻，都相信佢哋係一班有夢想嘅人，願意為諾基亞舊員工提供夢想嘅舞台。
