政壇：高官社運人趕出埠叉電

學聯變「半真空」

首先學界方面，香港專上學生聯會多名現任同前任成員，包括現任正副秘書長周永康同岑敖暉，前秘書長陳倩瑩等人，上周末搞完灣仔警察總部集會後就齊齊去咗台灣，打算到台北、台中等地玩番幾日，有人仲高呼「我在台灣天氣晴」，認真悠然自得。

對於學聯多名核心成員離港外遊，有人笑言學聯依家係「半真空」狀態，都唔知依家喺香港邊個先係正牌學聯發言人喎。至於佔領中環發起人之一戴耀廷，據聞近日都同屋企人去咗日本，稍事休息再搏殺過。

政府高官方面，據聞早前有人落柯打叫問責官員，呢段時間可以放假休息，不過最好喺本月中回港助陣，為月底嘅政改打仗做足準備，食物及衞生局局長高永文事先張揚，今日會同老婆去泰國玩幾日，到下周二先復工，事有巧合，尋日特首辦公布特首CY梁振英今日開始離港休假五日，直至周日為止。

無獨有偶，商務及經濟發展局局長Greg蘇錦樑亦喺同一段時間放假，不過佢同CY應該唔係去同一目的地，消息指阿Greg會到內地做義工，之不過二人都會喺下周一返工，完全符合晒問責官員要月中歸隊嘅要求嘞！