睇錯「孖仔燈」兩車互撼司機俱傷
【本報訊】疑睇錯「孖仔燈」兩車互撼，兩名司機俱受傷。昨晨五時許，一輛運載豆腐製品的貨車沿九龍塘窩打老道往尖沙咀行駛，途至禧福道燈位交界時，一輛私家車反方向駛至，兩車疑收掣不及迎頭猛撞，私家車車頭嚴重損毀，頭冚連泵把被貨車扯甩，更打「白鴿轉」停在路中。貨車則衝前二十米撼向分隔石壆停下。貨車姓郭司機（三十八歲）頸部受傷被困車內，由消防員救出，私家車姓吳司機（二十六歲）感不適，兩人齊送院治理。
現場交通燈屬於俗稱「孖仔燈」的設計；肇事私家車頭冚及泵把被扯甩。
運載豆腐貨車撞向石壆，車頭損毀。
據悉，現場禧福道交界的交通燈，屬一對兩組相連、俗稱「孖仔燈」的設計，警方不排除有人睇錯燈肇禍，惟意外原因仍需詳細查明。
