近期台灣意外事故頻頻,先有嚴重空難,後有高雄大爆炸,又有香港女教師喺台灣踩單車遇車禍等。計劃喺下月中率團訪台嘅金紫荊女企業家協會創會主席Elaine何綺蓮直言,聽到有關新聞都感到好心傷,但相信到訪台北仍然好安全,加上今次訪問有好多知名女企業家參加,好難再約過時間,所以決定如期赴台。

何綺蓮下月會率領一批香港同內地嘅女企業家出訪台灣,互相交流成功之道。

粵桂女強人同行

呢次台灣訪問團已有四十人報名,除Elaine任團長外,仲有第一常務副主席彭芷君同常務副主席丘璟珊,人稱廣東女首富嘅翟美卿就擔任榮譽團長,再由身為「台灣通」嘅女企業家羅台秦安排行程,包括拜會創立HTC手機品牌嘅「台灣女首富」王雪紅等。

Elaine透露,唔少內地企業都(目及)實台灣嘅發展機遇,因此廣東同廣西都有一批女企業家同行,加埋香港班女強人,大家互相交流成功之道,相信會擦出唔少火花。佢又話雖然兩岸之間嘅交流日益頻密,但好多台商仍然唔多了解中國,內地企業亦未必知道點樣打入台灣市場,香港正好扮演中間人嘅角色。

第一手消息請下載on.cc東網iPhone/iPad/Android/Windows Phone Apps