城中鏡：霍啟剛怕囝囝呷醋 添丁遲下先
雖然近排接二連三發生空難事件、高雄氣爆意外等，但亦無阻一眾名人出外旅遊嘅計劃。日前世界跳繩錦標賽閉幕，唔少政商同體育界名人亦有出席，趁機一睹運動健兒嘅敏捷身手。
霍啟剛同太太帶埋囝囝啱啱去完歐洲玩。
高永文睇跳繩睇到拍晒手掌，非常投入。
胡曉明（右）同太太梁子慧都鍾意打網球，但太太整親胸骨之後就唔再打嘞。
其中香港青年聯會主席霍啟剛講起空難事件，就話外遊時會揀大航空公司同坐大機，所以唔太擔心，仲啱啱同家人去完歐洲出席舊同學婚禮返嚟，順道去埋英國同意大利玩添！
伊波拉病毒咁得人驚，啱啱外遊完返港嘅霍啟剛就話都唔知點預防，但佢相信港人衞生意識夠高，唔擔心喎！
對於早幾個月有傳佢太太郭晶晶懷第二胎，佢就話只係傳聞，佢哋都想追多個，不過聽聞兩個小朋友年紀太近，大嗰個會呷醋，所以要隔多幾年先，仲反問記者有冇類似經驗添。為咗個仔，佢嘅考慮真係無微不至。不過佢諗兩諗，又話自己同細佬霍啟山相差四年，相處無問題，所以都係順其自然喎！
城大校董會主席胡曉明睇跳繩睇得好入神，原來佢十五歲開始就係中學網球校隊，訓練時經常要跳繩，鍛煉體能同彈跳力。而目前佢就係香港網球元老總會會長，仲不時打比賽，佢太太以前都好鍾意打網球o架，但三年前喺屋企發生意外，整傷咗胸骨，需要時間復原就冇再打嘞。
高永文睇跳繩拍爛手掌
同場仲有睇跳繩表演睇到拍晒手掌嘅食物及衞生局局長高永文，原來高雄爆炸時，佢咁啱身在台中，爆炸後收到過百個朋友嘅慰問訊息，雖然高雄爆炸影響唔到佢，但知道咁多朋友擔心佢，佢都好感動，佢又計劃同太太聽日去泰國玩幾日，不過最終去唔去得成，都要今晚先能確定。伊波拉病毒咁得人驚，高永文梗係要時刻留意住事態發展，如果殺到，佢當然行唔開啦。
