政壇：田二少撐場不忘拉票
公共小巴車主司機協進總會尋晚舉行就職典禮，有一大班立法會議員撐場，包括保險界陳健波、新界西直選議員「田二少」田北辰同前航運界議員劉健儀等。班議員喺發言時都不忘拉票，話小巴對公共運輸系統貢獻良多，叫業界有事嗰陣記得搵佢哋幫手喎！
田北辰（右二）出席小巴總會活動，不忘乘機拉票。左一為劉健儀。
陳健波話自己同一眾工會成員可以話係不打不相識，事關唔少小巴司機成日向佢投訴小巴保險費貴，佢惟有同對方解釋係由於部分小巴司機詐騙保險費，先令小巴保險費上升。之後佢哋仲一齊聯手打擊業內詐騙個案，大家就因此成為朋友。田二少仲話，對於港鐵成日壞車，作為重要接駁交通工具嘅小巴可謂非常重要，又話政府依家強制小巴司機修讀進修課程，大大增加司機負擔，呼籲大家如果對政府政策有乜嘢不滿，記得要搵佢幫手。
秘書長黎銘洪致辭時就話，無論邊個嚟過協進總會活動，之後都一定會升官發財，例如工聯會王國興上屆做勞工界議員時出席過總會活動，轉港島區直選即刻成功當選；運輸署有個官員有次因事無出席活動，過咗一排就即時畀人調走咗，非常神奇喎！
