泛民主派各黨派組成嘅飯盒會今年九月會輪換召集人,民協KK馮檢基將會功成身退,公文袋黨魁「袋巾傑」梁家傑將會接任,之不過KK疑似好眷戀飯盒會召集人名銜,一方面猛話擔心唔做召集人就會曝光率大跌,另一方面又話自己嘅召集人任期仲有五個禮拜,遲啲先會進行總結。觀乎KK嘅連串動作,似乎有意用盡召集人嘅政治影響力至最後一刻喎!

馮檢基疑似好眷戀泛民飯盒會召集人名銜。

全國人大常委會本月底會就政改訂下框架,KK形容到時政界可能會出現天翻地覆嘅轉變,相信身為召集人嘅佢到時仲有好多嘢要做。佢又透露,自己上星期曾致電政務司司長林鄭月娥,查詢泛民同負責政改嘅中央官員會面嘅進展,對方表示依家仲未收到中央回覆,不過,佢仍然覺得雙方仲有會面機會,因為今年四月上海之行都係短時間內通知泛民並成行咁話。

第一手消息請下載on.cc東網iPhone/iPad/Android/Windows Phone Apps