政壇：Google CEO讀書時已膽識過人
Google嘅行政總裁佩奇（Larry Page）由二○一一年起帶領呢間國際大企業發展各式各樣嘅業務。坐得呢個位，大家都知道佢幾有實力喇，但原來佢早喺大學時期已經有異於常人嘅創意同諗法，令佢嘅大學教授至今都記得佢嘅反斗作風，仲對佢讚譽有加。
Google行政總裁佩奇，學生時代已經膽識同創意十足。（資料圖片）
大學生做專題研習，諗題目都諗到頭痛，但佩奇竟然諗到一個風險又高、又難做嘅意念──入侵人哋嘅Palm Pilot電子手帳，做一啲「唔應該做嘅事」。當時佢嘅教授索羅威（Soloway）同佢自己都冇百分百信心會成功，而且畢竟呢個行為都有法律風險，佩奇要承受畀人捉到嘅危機。不過，教授並冇阻止佢去做，索羅威更加話，無論佢成唔成功，呢份功課都唔會唔合格，因為佢呢份膽識同創意十足嘅諗法唔係一般人可以相比咁話。
最後，佩奇搞掂計劃之餘仲功成身退，教授更加係畀咗A+佢。學生時代已經有咁嘅膽量同智慧，唔怪得佢依家都有非凡嘅成就嘞！
