政壇：公務員鬧財爺零溝通
話說政府日前向全體政策局同部門首長發通告，話要喺二○一六/一七連續兩個財政年度節省百分之一開支做儲備之餘，仲要上繳政府再分配。財爺曾俊華（鬍鬚曾）前日又做「鍵盤戰士」，喺網誌上話政府開支高速增長，如果唔減速就會有結構性財赤。香港公務員工會聯合會總幹事梁籌庭就鬧爆鬍鬚曾，話佢對政府要緊縮開支呢啲咁重要嘅事，竟然完全冇問過公務員嘅意見，淨係識喺個人網誌發布訊息，咁搞法只會激發公務員同政府嘅矛盾喎！
設計圖片及對白
梁籌庭尋日話政府突然宣布要緊縮開支，事前又冇同公務員傾過，搞到唔少公務員經傳媒得知消息之後都好憂心，唔知政府會唔會為咗節省資源而做無良僱主，向公務員職位埋手實行裁員，又或者用埋啲「陰招」，如喺有人手流失時又唔請人等。對於公務員同事個個喺度估估下，梁籌庭就炮轟政府冇透明度，又鬧鬍鬚曾淨係識得做「鍵盤戰士」︰「佢根本就係唔肯同公務員對話，淨係識透過大氣電波、透過網誌發布訊息，咁樣交流訊息唔止達唔到預期目標，仲會激化公務員同政府嘅矛盾。」
削服務前線淪磨心
除咗驚裁員，公務員最怕就係做磨心。聯合會主席曾森就話，如果政府因要削減開支、慳番啲資源而減少提供公共服務嘅話，佢哋就頭痕喇！因為分分鐘會引起市民不滿，到頭來又係一班前線公務員受罪。
另外，聯合會一直都希望政府可以畀全體公務員一次過選擇係咪延遲退休，但局方嘅諮詢文件就話，部分願意喺退休年齡後繼續留低嘅公務員，佢哋嘅技能同表現未必符合部門要求。曾森就問如果做幾十年都話唔符合要求，咁佢哋平時返工做乜嘢？批評當局明顯喺度「抹黑」公務員咁話。
