今天，在香港寫時評，較往時困難。

以前，香港傳媒各有取向，左中右俱全，一睇個報頭，便知其立場，形象鮮明。依家，除幾份態度堅定的大報外，那些標榜持平中立的「細報」，時左時右，甚至不左不右，好多時，報裏內容，唔知邊啲係真？哪些是假的！叫人頭痕！

我每日，至少睇五份報紙，仲未計上網和聽住收音機，追最新消息及睇群眾的comment，花在這些「資訊」收集的時間，無三粒鐘，都要兩粒半！好嘥時間！就係想從多角度去睇清「事實」。

前日，「報載」財經事務及庫務局曾向所有政府部門發出通知，要求各部門每年減少百分之一開支作儲蓄用途，即時，有報章話財政司司長曾俊華為控制開支增長，背後動機其實係加強閂水喉的力度，「阻礙梁振英大展鴻圖」；另有報紙卻指斥「特首進一步奪取政府財政大權」，「取消以往各部門可公平競爭資源的做法」，「特首高度集權，叫你做乜便做乜，無得主動提議」云云。上述兩個「報道」，沒得到「有關人士回應」和「證實」，但有一共通點，就是政府高層正在「內鬥」（進行中）。

拿平民福祉做棋子，是政治鬥爭的常態，邊度都一樣。以今劑香港政府削減開支為例，特首出招「奪權」成分佔高，因財政司掌數和點做，本是正規行為，成敗要「問責」，但特首插手入去，是向阿爺交代，以資證明佢勤力有加，有做嘢；若不幸出岔子，財爺孭鑊便是；如做得好，這就係佢領導有方囉！如斯陰招無得輸，怎可唔做？即如佢將政改方案搶先送上京，比林鄭宣布結果還要早！這正是爭功的謀略囉！

有人已急不及待開展咗「連任」工程，辦公室主任也埋咗位，做緊嘢！香港人睇路呀！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android/Windows Phone Apps