城中鏡：何國鉦祝福有情人
本地著名時裝設計師Dorian何國鉦前日趁住「七夕」呢個咁浪漫嘅日子，同一間酒店合辦晚宴並為婚宴展覽揭幕，好多城中名人好友都來撐場，立法會紡織及製衣界議員Felix鍾國斌為咗配合大會「五十年代服飾」嘅主題，上網鑽研咗好耐，得出結論竟然係男士無論五十年代同今日都係鍾意着西裝，所以冇乜分別喎！
何國鉦（戴眼鏡者）趁七夕情人節舉辦晚宴為婚宴展覽揭幕。
鍾國斌游開水身形弗，着乜都好睇。
戴凱欣（左二）與好友Eric（左一）、郭詩慧（右二）同老公陳振邦（右一）悉心打扮出席。
鍾國斌運動Keep Fit
主人家Dorian就藉住展出一系列女士夢寐以求嘅婚紗，祝福單身人士快啲搵到伴侶，結咗婚嘅就珍惜眼前人喎！
以彩色波點恤衫現身嘅Felix，雖然認為男士喺乜嘢年代都係着西裝居多，但身為「水怪」嘅佢，顯然深明身形夠弗就着乜都好睇嘅道理，所以除咗游過渡海泳之外，佢仲長期運動以保持體態。而佢同Dorian則分屬世交，事關上一代都係從事製衣業，Felix更大讚好友腦筋靈活，由市場策劃到轉型做設計都一樣咁成功，自己亦感光榮。
同場仲有四洲集團太子女Kennis戴凱欣、中華國術（香港）總會會長王嘉恩、莎莎太子女Melody郭詩慧同型仔老公Davis陳振邦。一身粉紅Pink Lady造型嘅Kennis本來計劃月中到台灣旅遊減壓，但發生高雄大爆炸事件，加上近月工作同喜慶活動都非常頻繁，所以要重新考慮。
Kennis又話近月數宗空難事件，令佢回憶起過往一次驚嚇旅程。有次佢因機位問題，臨時改乘馬航由香港前往吉隆坡，途中客機在空中顛簸不定，其後轉乘內陸航班往檳城時，更因機件故障，於冇燈冇冷氣嘅情況下被困機內一小時，幸好最終平安到埗，但就嚇到佢以後就算免費都唔敢坐，冇位情願取消旅程。
