政壇：搞搞政：立會「落閘」 陳維安十五十六
話說行政署上月中突然宣布關閉政府總部東翼廣場進行加建圍欄工程，「門常開」變為「門常關」，即時畀人權組織同示威常客鬧爆，點知毗鄰嘅立法會不但無吸取教訓，有立會行政管理委員會成員建議效法政總喺玻璃外牆加設鐵閘，等第時有乜風吹草動就迅速「落閘」。據聞立會主席曾鈺成同立會秘書長陳維安，依家對「落閘」建議十五十六，惟有施展「拖字訣」，等早前委託嘅檢討大樓保安報告出台後再作決定喎！
設計圖片及對白
有政總呢個隨時「落閘」同加設圍欄決定在前，據聞有行管會成員憶述反新界東北示威者當時衝擊大樓時，雖然有鐵馬隔開示威者，但由於立法會大樓太多玻璃，加上玻璃同鐵馬之間無其他物件阻隔，令示威者一眼就睇晒成個大樓，不但連警方部署都睇得一清二楚，立會保安亦只可以用「人肉盾牌」擋住啲示威者，為咗治標又治本，有人建議秘書處效法行政署喺玻璃外牆加設鐵閘，等第時遇有示威者入侵就即時「落閘」，頂唔到一世都頂得住一時喎。
有人提出建議就要檢視吓係咪可行，有立會秘書處中人話鐵閘其實有多項功能，除可作為屏障擋住示威者，仲有其實際用途，舉例指平日可以將鐵閘捲起，一旦假日或打風時就可以「落閘」，費事啲玻璃被吹爛而發生意外。
但有心水清嘅人提醒，立會早前委託顧問公司檢討大樓保安嘅報告一日未完成，秘書處都唔會輕舉妄動，費事畀人話有既定立場，究竟立會「落閘」建議會否成行，相信唔使好耐，就會有終極嘅答案嘞！
