政壇：樹根遊加獲政要厚待
因為全國人大常委會本月底會就政改訂立框架，泛民主派唔敢喺呢段時間行開，擔心佔中一觸即發，但係建制派嘅立法會議員鍾樹根竟然喺政改關鍵時刻前夕去咗加拿大，莫非係去勾結外國勢力？
鍾樹根到加拿大旅行兼拜訪當地議會，獲前市長接待。（互聯網圖片）
黃碧雲同老公到俄羅斯旅行，期間撞到好多內地旅客。（互聯網圖片）
非也，其實樹根只係去咗加拿大白馬市（White Horse City）旅行，順道拜訪當地議會，獲得同姓三分親嘅前市長鍾富喜接待。
樹根喺社交網站話，鍾富喜曾經做過四屆市長，見到佢今次遠道由香港而嚟，於是陪同參觀議會內外，又向佢解說白馬市嘅歷史同風俗，感到樂而忘返喎。
另一邊廂，泛民主派議員「一舊雲」黃碧雲同老公就選擇去俄羅斯首都莫斯科旅行，佢哋首先去參觀當地有名嘅紅場同克里姆林宮，再去參觀保存多年嘅列寧遺體同史太林嘅墓碑。一舊雲話旅行期間遇到唔少內地旅客，當中有唔少都係個人遊遊客，感慨中國經濟發展令唔少內地人愈嚟愈富有。一舊雲同老公其後搭通宵火車去聖彼得堡，似乎係想充足電，迎接即將出爐嘅人大常委會就政改嘅決定噃！
