政壇：建仔富貴黨 區選夾攻哪吒
明年年尾將舉行新一屆區議會選舉，選舉管理委員會月前公布區議會選舉選區劃界建議，建議新增十九個區議會議席，並調整一百一十一個現有選區分界。西貢區議員「哪吒」方國珊原有嘅環保選區被一開為二，準備劃為環保北同環保南兩個新區，雖然咁做仍然有利哪吒，兼帶多個新人出選，但據聞建仔同富貴黨為咗唔想哪吒繼續稱霸將軍澳，決定雙方各派一人挑戰兩個新區，務求令哪吒唔可以贏晒兩邊。換言之，今次係建制派聯手夾擊哪吒。
設計圖片及對白
哪吒喺○四年加入富貴黨，○七年獲委任為西貢區委任區議員，但喺一○年五月，佢不滿被富貴黨黨魁田北俊責難，去信黨中央辭任新界東支部主席，更加喺半年後宣布退出富貴黨。佢其後改以獨立身份參選上屆區議會，並以逾八成得票率當選為區議員，佢兩年前亦有參加立法會新界東地區直選，但票數不敵新民主同盟范國威，無緣進身立法會。
打亂「一帶一」部署
對於下屆區選選區被「一劏為二」，有傳哪吒會選其中一區，另外嗰區就會派新人出戰。不過，雖然佢未決定落戶邊區，但建仔同富貴黨一早已經安排社區主任密密落區做嘢，當中富貴黨就派出哪吒前助理崔定邦，而建仔就派出立法會新界東直選議員葛珮帆嘅助理胡綽謙。
哪吒坦言都幾擔心出年嘅選情，話自己除堆填區議題外，亦有關注區內其他議題，認為外界話佢唔勤力嘅講法唔公道，又投訴兩黨派人出選佢嘅選區，好明顯係針對佢而嚟。不過相信喺兩黨左右夾攻下，哪吒希望「一帶一」嘅如意算盤未必再打得響，睇怕佢要再諗諗計，睇吓點樣可以繼續保住個議席喇！
