SUN搞作：少膽虫手記：門常小
少膽虫返到公司，「丟」聲四起，「做咩一返嚟就要丟我？」再望多望，見淫賤黎房門前多咗幾塊圍板，原來啲人要嫌啲板阻碇，話要丟咗佢哋。少膽虫喺人群中左擠右擁，終於入到淫賤黎間房，只見佢蹺起二郎腿，一臉不在乎。
「腦細，做咩要喺門口棟幾塊板？門常關，唔係幾好喎……」淫賤黎面色一轉，「仲好講，成日因為加薪問題衝擊我間房，唔加強啲保安點得？」少膽虫見淫賤黎眼光凌厲，為求自保，惟有落足鞋油大力擦，「英明，腦細英明，如果畀人日日入門發聲，門內有音，闇也，壹全霉實會一片黑暗！」
「都算啱聽，繼續。」淫賤黎怒氣暫消，少膽虫打蛇隨棍上，「腦細，橫掂都係，不如將對門整細啲，等啲人就算過到圍板，都無咁易入到你房，門常小，實保你安全！」淫賤黎拍手讚好，「好計！就照你意思做！」
「門內有小人，門小仲唔啱晒你咩，腦細！」少膽虫敢怒不敢言……
