「沒女」呢個潮語，顧名思義係同「女」有關。相關嘅潮語近年可謂不少，「中女」即係指二十五歲打後年華漸去嘅女子；「剩女」即係「賣剩蔗」，喺條灶罅等出貨嘅女士；「港女」當然唔使多解釋，你我身邊總有一兩個。咁「沒女」又係乜呢？「沒女」嘅「沒」，即係沒美貌、沒身材、沒儀態、沒錢、沒權、沒男人……總之係乜都「沒」嘅N無女士，都可稱之為「沒女」。

唔知大家仲記唔記得，兩年幾前有個真人Show電視節目，叫做《盛女愛作戰》。內容係講一批廿到尾至三十頭嘅「中女」，改頭換面，學習相處禮儀，又人生教練又盛，喺節目中由一個「剩女」，即係俗稱「賣剩蔗」無人要嘅港女，經修飾加工之後，蛻變成有儀態、美貌嘅My Fair Lady。到底呢班盛女結果如何？佢哋之後嘅人生有乜進展？相信冇人有興趣知，因為佢哋嘅人生甚至死活並唔係重點，重點只係要有收視就得。呢啲所謂「真人」喺節目過後，都不會逃得過用完即棄嘅命運。毫無創意可言嘅大台之後繼續再推出一個以男士為主嘅節目，據說收視成績一般。但係呢類靠參加者出賣自己人生，換取收視率及知名度嘅節目，永遠都有市場。唔止喺香港，外國同類節目一樣係五花八門。可能因為觀眾總愛將快樂建築喺別人嘅痛苦同坎坷之上，所以呢啲節目長做長有。最近，大台又打算將呢啲節目推向極限，推一批「沒女」出嚟，登時網上嘩然，因為啲參加者個個極品級！

睇番大台節目裏面嘅「沒女」，無論樣貌身形舉止，都相當之「重口味」，仲有一啲語帶鄉音嘅「新香港人」。要幫呢班女士重新包裝？仲要標籤佢哋為「沒女」？成件事無論從參賽者同觀眾角度睇，都相當殘酷！人生價值唔係為穿華衣羅裳、Set頭化妝，唔通執靚個樣就可以由N無變成「百有」？我真係睇唔透。

「沒女」呢啲節目我係決意唔會睇，因為我冇時間冇興趣自虐。講番轉頭，我沒樓、沒車、沒公民提名權、沒真普選……我又是否「沒男」呢？

第一手消息請下載on.cc東網iPhone/iPad/Android/Windows Phone Apps