政壇：搞搞政：卿姐阿基懷念立會無掟嘢
立法會嘅激進泛民近年言行愈嚟愈出位，由掟香蕉、毛公仔、陰司紙到玻璃杯，殺傷力愈來愈大，兩名資深泛民議員劉慧卿（卿姐）同馮檢基（阿基）尋日出席一個有關「政治禮儀」嘅論壇時，就齊齊懷念過去立會無掟嘢嘅日子。
設計圖片及對白
「尤德學者協會」尋日舉行論壇討論香港現時嘅政治氣候同政治禮儀，卿姐同阿基都有應邀出席。卿姐強調自佢九一年首次進身立法局至今，佢本人一直都冇變過，但環繞佢身邊嘅議員衣着、談吐，以至開會嘅禮貌同程序，就不斷係咁轉變。由最初偶爾掟吓蕉、爆吓一兩句諧音粗口，到依家爆粗掟嘢已變成規範咁，感到好可惜。
單靠激進或產生反效果
阿基就憶述，喺八、九十年代，佢絕對係社會上最激進一員，例如當年立法局個個男議員都打呔着西裝，佢就唔肯跟隨，但都唔會着條短褲去開會。至於開會時展示示威標語及道具，阿基更自言係由佢創先河，當年佢帶咗把「尚方寶劍」道具入會議廳，立即被當時嘅立法局主席施偉賢拉入房「訓話」。依家激進言行抬頭，但傳媒又會特別關注，形成惡性循環，佢哋兩個就話，單靠激進行為未必逼到政府就範，甚至會產生反效果。
