政壇：長毛返深水埗憶亡母女友
有文化團體尋日喺深水埗通州街，搞咗個回憶深水埗舊貌嘅藝術展，搵到立法會議員「長毛」梁國雄、香港當代文化中心總監黃英琦（Ada）同多名本地藝術家出席開幕禮。期間長毛睹物思人，憶起亡母，仲話因為媽媽嘅關係，細細個已成日同啲鬼妹仔玩埋一堆，長大後更結識咗一位愛爾蘭裔女友添！
長毛重返深水埗憶起與亡母及外籍女友嘅生活點滴。
霑叔自五二年開始就喺深水埗尋找寫生題材。
不過，個展覽原意係叫政府重建時要保留舊區建築物同特色，但長毛就唱反調話，自己對死物冇乜興趣，好似有人問佢會否懷念母校，佢就直言唔會。至於深水埗區令佢最難忘嘅，就係佢同亡母嘅生活點滴。長毛透露佢媽媽以前喺深水埗兵房幫外籍人士打住家工，不時會湊住啲鬼妹、鬼仔落北河街玩，佢想多啲見到媽媽，就要自己去深水埗搵佢，順便同佢媽媽湊住嘅鬼妹仔玩。
年屆八十三歲嘅本地畫家歐陽乃霑（霑叔），自五二年開始就喺深水埗尋找寫生題材。佢話以前嘅深水埗區充滿人情味，不論佢企喺度、坐喺度，又或者走入果欄寫生，都會有街坊好自然咁同佢傾偈。依家該區愈嚟愈多高樓大廈，社會逐漸變得冷漠，令佢感到好悲哀。
