食飯太快唔健康，日前我哋就見到工聯會議員王國興（阿王）一支公去咗立法會大樓對面嘅中信大廈某快餐店食飯。不過，阿王食飯真係快過打針，前後用咗約十分鐘就食飽抹埋嘴走人。

王國興去咗立法會大樓對面嘅中信大廈某快餐店食飯。

我哋之後問佢做乜咁趕，佢透露早喺立法會爆發拉布戰前，已養成「極速」醫肚嘅神功，一來喺快餐店食嘢，費事食咁耐阻住其他人，二來亦可親身體驗吓啲基層打工仔平日無啖好食嘅生活。但食飯太快，腸胃會不適喎，阿王就話未試過，反而拉布戰令佢要由朝坐到晚，就令到有腰痛問題嘅佢叫苦連天。

點解啲議員拉布時會培養到極速吃飯？事關拉布議員其中一絕招，就係瘋狂響鐘點算法定人數，一來可以拖吓時間，甚至引發流會，結果建制議員食飯、去洗手間都要計時。

第一手消息請下載on.cc東網iPhone/iPad/Android/Windows Phone Apps