政壇：高永文借題發揮鬧議員抽水

食物及衞生局局長高永文尋日出席「永不放棄同學會畢業禮」活動時，同台下嘅文憑試考生分享佢喺立法會嘅永不放棄經驗，強調只要唔肯輕言放棄，堅持落去，隨時會有奇迹出現。佢又話最憎啲議員借題發揮「抽水」，無理批評佢唔勤力同拒聽民意。但話說回來，高永文借勉勵學生開火炮轟議員，又係咪另類嘅「抽水」呢？

食物及衞生局局長高永文尋日出席「永不放棄同學會畢業禮」活動時，同台下嘅文憑試考生分享佢喺立法會嘅永不放棄經驗。

高永文指出，議員有權否決政府嘅撥款申請同法案，唔係官員簡單講句「永不放棄」就可以搞掂，不過佢亦試過睇死某項議題過唔到立法會嗰關，但最後又奇迹地獲得通過，藉此勉勵學生唔好輕易放棄。唔知佢係咪講緊早前差啲因財委會拉布戰而泡湯嘅瑪麗醫院重建撥款呢？

高永文又話，議員對政府政策有唔同睇法好正常，但佢最憎啲議員借機「抽水」，責罵佢唔勤力、冇落區同拒聽民意等，認為呢啲說法係與事實不符。致辭完畢後，佢仲搞爛Gag話自己就要「落台」喇，未來係屬於台下嘅同學仔，此台不同彼台，啲同學仔一啲誤會都冇。