政壇：阿人「袋住先」 着數多籮籮
壹傳媒老闆黎智英向多位泛民議員提供巨額政治獻金一事，收咗錢嘅議員一直死撐，話啲錢係代所屬政黨同團體收嘅。不過，工黨主席李卓人（阿人）日前終於認衰，承認將五十萬元捐款「袋住先」、並且一袋就九個月，佢死撐因為不涉個人利益，所以毋須申報。不過，市民嘅眼睛係雪亮嘅，有心水清嘅市民就同我哋踢爆，阿人雖聲稱「自己冇袋過一分一毫」，但若私人帳戶有五十萬元，既可作私人投資、又可享大額存戶嘅尊貴待遇，甚至獲贈禮品等，着數滾滾來！少則數千、大則幾萬都有可能，呢啲唔係個人利益咩？
設計圖片及對白
心水清嘅市民話，「袋住先」嘅款項可以帶來可觀嘅利息收入、大額存戶嘅優惠，種種都涉及直接金錢利益，唔申報或遲申報絕對係違法、違規！佢舉例話，雖然依家港元存款利息偏低，但以阿人「私吞」肥佬黎五十萬元捐款長達九個月計算，放喺自己銀行戶口做定期，仍可賺數千至最多接近一萬元嘅利息收入。
隨時獲利5萬元
若果投資有道，咁樣去年十月收到呢筆捐款，只要趁低位用晒嚟買跟隨恒指升跌嘅盈富基金，穩穩陣陣，即使東窗事發後先沽出，單計基金價格升幅亦高達一成，帳面獲利高達五萬元喇。早前，其他議員連幾十蚊嘅《基本法》都要申報，咁阿人係咪要申報五十萬元喺私人帳戶中嘅利息、或動向呢？
另一位讀者更加絕，專登搜尋咗本港多間銀行對大額存戶提供嘅種種優惠，包括送禮品、送積分、現金回贈、免批低息貸款、以至去銀行辦手續可以「打尖」排快隊等，質疑泛民議員可利用將巨額捐款「袋住先」嘅機會，由普通銀行存戶變身大額存戶，將相關優惠「袋埋落袋」。咁都仲好意思話冇個人利益，難怪阿人畀人話係「李呃人」。
