喺壹全霉新聞創作部入面，本虫最睇得起新人明仔。點解，因為新囉，試想想肥豪膠蘇之流，入咗嚟服侍淫媒咁耐，就好似畀幾千人捏過嘅麵包咁，你仲會唔會話好想食？仲會唔會話好好味？之不過我想扶起明仔嘅心可能太明顯，令佢一下子囂起嚟，今日仲走埋我個位「講數」添。

「腦腫，唔使講咁多，我要八萬人工！」本虫一聽真係差啲笑死，「明仔呀明仔，你真係以為自己識飛咩？就算識飛最多都係值萬八，你估你鑲珠……唔係，鑲金o架！」明仔畀我寸完繼續鍥而不捨，仲爆出（舌累）加人工嘅原因：「虫哥，唔係我鑲金，係我條女呀！佢港女嚟o架，個個月使開七萬，又唔稀罕打工，咁我惟有搵多啲先養得起佢囉！」

本虫一聽真係火都嚟，但都忍住脾氣好言相勸：「冇咁大個頭唔好笠咁大個套，好似貪曾貪湯咁，cheap精妄想龍穿鳳，咁咪出事囉！七萬蚊港女，你養唔起o架，夾硬嚟遲早出事！」明仔畀我講中心事，一邊咬唇一邊滴淚，回頭之前拋低一句：「係，係港女，不過我鍾意！就算要我學貪曾咁cheap菜心都擸，好似貪湯咁狗公帑食牛雜，我都要照顧佢！」明仔嘅狠勁打動咗我，本虫決定加佢五百蚊人工，喺條女面前威吓，仁至義盡喇！

第一手消息請下載on.cc東網iPhone/iPad/Android/Windows Phone Apps